Kompania kineze, “Jiangxi Koper” nëpërmjet blerjes së 50 % të aksioneve të kompanisë turke ‘Beralb” që ka me koncesion vendburimet e bakrit, hyn në tregun shqiptar. Ja rezervat shqiptare të bakrit

Gjiganti kinez i bakrit “Jiangxi Koper” do të operojë në gati të gjitha vendburimet e bakrit në vendin tonë, pasi ka blerë 50 për qind të aksioneve të kompanisë turke “Beralb”, që ka me koncesion shfrytëzimin e metalit në Shqipëri. Burimet nga Ministria e Energjetikës kanë pohuar për mediat se kompania kineze ka blerë në Turqi 50 për qind të aksioneve të “Nesco Metal”, e cila ka në pronësi 100 për qind të aksioneve të shoqërisë “Beralb”. Kjo e fundit ka me koncesion nga qeveria shqiptare vendburimet më të rëndësishme të bakrit në Shqipëri, si minierën e Munellës, Lakroshit, Karmës, por edhe Fabrikën e Pasurimit në Fushë-Arrëz.

 Kush janë kinezët

“Jiangxi” është prodhuesi më i madh i bakrit në Kinë dhe kompania e dytë më e madhe në botë në këtë fushë. Operacionet e saj përfshijnë minierat të bakrit, bluarje, shkrirje dhe rafinim. Jiangxi prodhon 340 000 ton bakër në vit nga minierat e saj. Kompania kineze është gjithashtu e angazhuar në prodhimin, përpunimin dhe shitjen e bakrit, shufrave dhe telave të bakrit dhe produkteve të tjera të ngjashme.

Por kompania gjithashtu ofron metale të çmuara, të tilla si ari dhe argjendi, produkte kimike të tilla si, acidi sulfurik, squfuri, të cilat koncentrohen, si dhe metale rralla të tilla si: molibden, selen, renium, telur dhe bismut. “Jiangxi Koper” është përfshirë gjithashtu në eksplorimin dhe shfrytëzimin e bakrit, arit, argjendit, plumbit e zinkut, si dhe në ofrimin e shërbimeve financiare. Ajo “Copper” shpërndan produktet e saj në tregjet e brendshme dhe eksporton në Hong Kong, Tajvan, Australi dhe Tajlandë etj.

Rezervat e bakrit

Nga viti 2005 deri në vitin 2013, çmimi i shitjes së bakrit për eksport ka pësuar luhatje të vazhdueshme. Sipas përllogaritjeve të Open Data Albania, çmimi i bakrit në vitin 2013 është reduktuar në më shumë se 6% kundrejt vitit 2012. Bakri renditet sot ndër mineralet më të çmuara që eksportohet nga Shqipëria. Ai nxirret në zonën e Fushë-Arrëzit dhe përpunohet në formën e koncentratit të bakrit në fabrikën e kësaj zone që administrohet nga kompania turke “Beralb”.

Në total, në Shqipëri nxirren në vit rreth 300 mijë ton bakër, i cili më pas përpunohet si koncentrat për t’u eksportuar. Sipas të dhënave të autoritetit doganor, kompanitë blerëse të bakrit të eksportuar deklarojnë destinacione fillestare si Itali, Bullgari, Greqi etj., por kryesisht këto nuk janë tregjet përfundimtare, por segmente tranzit për një treg final si Kina. Gjatë periudhës së socializmit, ekonomia ka pasur një industri me kapacitete domethënëse të përpunimit të bakrit në vend. Rezervat kombëtare minerare të bakrit përllogariten të jenë 32 milionë tonë.

Kjo sasi rezervash gjendet në pesëdhjetë depozita apo miniera të ndryshme ekzistuese. Më konkretisht depozitat e njohura sot të bakrit ndodhen në zonën e Korçës, Mirditës, Pukës, Shkodrës, Kukësit dhe në zonën e Hasit. Vetëm në zonën e Munellës rrethi i Pukës janë rreth tetë milionë tonë të rezervave të njohura të bakrit. Mirdita dhe Puka kanë potencialin më të madh bazuar në sasinë e prodhimit dhe numrin e minierave të bakrit