Vdekjet e fëmijëve nën 5 vjeç, Shqipëria numrin më të lartë në rajon

Vendi ynë renditet ndër vendet me vdekshmërinë më të lartë të fëmijëve të moshave nga 0 deri në 5 vjeç. Të dhënat e fundit, marrë nga organizma të huaja si UNICEF, publikuar edhe nga “Open Data Albania”, referuar vitit 2012, rendisin vendin tonë në vendin e parë sa u takon vdekjeve të moshave fëminore krahasuar me vendet e Rajonit dhe Europës. Statistikat dhe grafikët e UNICEF-it tregojnë se vendi ynë ka përqindjen më të lartë të vdekjeve, si pasojë e aksidenteve, plagosjeve, lëndimeve. Numri më i lartë i viktimave është më shumë te meshkujt sesa te femrat. Ndërkohë që për problematikat për humbjen e jetës së moshave të fëmijëve nga 0-5 vjeç, jepen edhe të dhëna pozitive për politikat shëndetësore. Në Shqipëri, vdekjet e fëmijëve 0–5 vjeç, nga sëmundje si malaria, SIDA apo fruthi është në nivelin 0%. Problemet më të mëdha lidhen me ndërlikimet në muajin e parë të lindjes, ku renditet edhe përqindja më e lartë e vdekjeve.

Vdekjet 0-5 vjeç

Sipas treguesve të vdekshmërisë, në vitin 2012 rezulton se ndërlikime të muajit të parë pas lindjes përbëjnë 47% të rasteve të vdekshmërisë së fëmijëve 0-5 vjeç. Ky nivel referon nevojën për një kujdes cilësor post natal, pas lindjes. Po kështu, pneumonia është një diagnozë e 11% të vdekjeve të fëmijëve nën moshën 5 vjeç, ndërsa një tregues mjaft i rëndë shënohet në përqindjen e numrit të vdekjeve, si pasojë e lëndimeve fizike dhe aksidenteve. Ky shkak qëndron në nivelin 10%, duke rrëfyer se një ndër dhjetë fëmijë shqiptarë, që vdesin në këtë moshë të hershme, 0 deri 5 vjeç, është viktimë e dhunimit, aksidenteve apo armëve të zjarrit.

Në Shqipëri, vdekjet e fëmijëve 0–5 vjeç nga sëmundje si malaria, SIDA apo fruthi është në nivelin 0%.

Plagosjet

Ajo që bie në sy është se përqindja e vdekshmërisë nga plagosje dhe lëndime është tepër e lartë në krahasim me vende të Rajonit apo Europës në tërësi. Nga hulumtimi i “Open Data Albania”, lëndimet e plagosjet bëhen shkak i vdekjeve, pesë herë më shumë se në Maqedoni, dy herë më shumë se në Bosnjë-Hercegovinë. Edhe në Serbi dhe Greqi, vdekjet shkaktohen nga lëndimet e plagosjet, shumë herë më pak sesa në Shqipëri.

“Është interesante të themi se krahasuar me Shqipërinë, ka shumë pak vende në botë, me vlera më të larta të përqindjes së vdekjeve që shkaktohen nga lëndimet dhe plagosjet. Këtu përmenden SHBA-ja, Kina, Luksemburgu, Lituania, Estonia, Republika e Koresë etj. Kjo është një situatë aspak pozitive, e cila duhet të tërheqë vëmendjen për të shtuar përpjekjet për siguri më të mirë të jetës nga aksidentet, dhuna dhe armët e zjarrit”, referon ODA.

Pavarësisht nga progresi i arritur, rezultatet e shëndetësisë në Shqipëri mbeten prapa atyre të vendeve në Rajonin e Europës Juglindore. Sipas raportit të fundit të Avokatit të Popullit, në mënyrë të ngjashme, të dhëna të vlerësuara, të cilat korrigjojnë raportime për shifra më të ulëta, e vënë Shqipërinë më prapa vendeve të tjera në Rajonin e Europës Juglindore për sa i përket vdekshmërisë foshnjore.

Som

Ndërlikimet, muaji i parë pas lindjes më problematiku, humbasin jetën 47% e rasteve

Shkaqet

Vdekshmëria

Shqipëria është vendi i Rajonit me numrin më të lartë të vdekshmërisë së fëmijëve në moshën 0-5 vjeç

Viti 2012

Në vitin 2012, për çdo 1000 fëmijë që lindin në vend, vdesin 17 të moshës nga 0-5 vjeç

Aksidentet

10% e fëmijëve që vdesin në moshën 0-5 vjeç janë viktimë e aksidenteve dhe armëve të zjarrit

Ndërlikimet

Vdekshmëria për moshën 0-5 vjeç shënon 46,5% për shkaqe që lidhen me ndërlikime të muajit të parë të jetës

Pneumonia

11% e rasteve të vdekshmërisë së grupmoshës 0-5 vjeç janë për shkaqe të pneumonisë