Fluturime në Aeroportin e Rinasit, pesha që mbajnë kompanitë në treg 2005 – 2012

Open Data Albania po hulumton mbi numrin e pasagjerëve që kanë fluturuar në Aeroportin e vetëm në Republikën e Shqipërisë, Aeroporti “Nënë Tereza” i Rinasit. Hulumtimi ka konsideruar numrin e pasagjerëve të secilës kompani ajrore. Qëllim i analizës veç trendit të pasagjerëve ndër vite, është edhe vlerësimi i peshës që kanë kompanitë ajrore që veprojnë në tregun vendas.

Konkretisht në harkun kohore 2005 – 2012 numri i pasagjerëve ka regjistruar rritje dinamike, kjo edhe si pasojë e liberalizimit të vizave dhe regjimit të ri të lëvizjes në hapësirën Shengen për shtetasit e Republikës së Shqipërisë. Trendi ka qenë rritës deri në vitin 2011 duke shënuar rënie vetëm në vitin 2012 ku totali i pasagjerëve në 2012-ën ka rënë me 8.5% krahasuar me totalin e pasagjerëve të një viti më parë.

Zhvillimet në numrin e fluturimeve dhe pasagjerëve që prej vitit 2005 janë reflektuar edhe në lëvizjet e trafikut ajror që pasqyrojnë lëvizjet e avionëve në hapësirën ajrore shqiptare.  Në fund të vitit 2012 janë regjistruar 20 528 lëvizje (fluturime) të trafikut ajror në hapësirën tonë, me një rënie prej 10.7% ndaj një viti më parë.

Sipas hulumtimit të Open Data Albania bazuar në të dhënave të numrit të pasagjerëve tregu i fluturimeve ajrore sipas numrit të udhëtarëve në fund të vitit 2012 është dominuar nga kompania vendase Belle Air. Kjo kompani për 2012 ka mundësuar fluturime për më shumë se gjysmën e pasagjerëve të aeroportit Rinas. Konkretisht këtë vit ajo ka mbartur 50.1% të peshës së tregut. Çdo kompani tjetër në treg ka një peshë shumë me inferiore kundrejt BelleAir ku konkretisht  Alitalia dhe Air One kanë mundësuar secila vetëm me nga 9.6% të totalit të pasagjerëve.

Belle Air është kompania me rritjen më të shpejtë në treg sipas numrit të pasagjerëve. Që nga viti 2006, kur Belle Air nisi operimet në hapësirën shqiptare ajrore, ajo e ka rritur peshën e saj shpejt kundrejt kompanive të tjera që kanë humbur pjesë nga pesha e tyre.