Viti 2013 ishte ndër më pozitivët e 5-vjeçarit të fundit, me një bilanc tregtar që arriti në minus 266 miliardë lekë. Bilanci tregtar është përmirësuar 16% kundrejt një viti më parë.
Përpunimi dhe komentet: ODA
Nga analiza e të dhënave shihet se niveli i eksporteve, ka shënuar vlerën e tij maksimale të 20 viteve të fundit gjatë vitit 2013. Eksportet arritën në mbi 246 miliardë lekë, duke u rikuperuar ndjeshëm dhe duke përmirësuar kështu bilancin tregtar të Shqipërisë. Viti 2009, është një ndër të paktat vite ku janë ulur të dy treguesit krahasuar me vitin e mëparshëm (edhe importet edhe eksportet). Kjo shpjegohet me krizën globale, dhe uljen e kërkesës brenda dhe jashtë vendit.
Nga ana tjetër, importet kanë shënuar rënie si pasojë e rënies së konsumit të brendshëm prej krizës ekonomike në vend, por edhe nga rritja e prodhimit vendas të produkteve bujqësore. Importet në fund të vitit 2013 arritën në 512.2 miliardë lekë, duke u zvogëluar 3% kundrejt vitit 2012 dhe njëherësh duke shënuar vlerën më të ulët të tre viteve të fundit.
Përpunimi dhe komentet: ODA
Rritja e eksporteve nga njëra anë dhe ulja e importeve nga ana tjetër kanë mundur të shënojnë një përmirësim të bilancit tregtar të Shqipërisë, që megjithatë vijon të mbetet negativ.