Yield është interesi i kuotuar në treg i cili ndryshon në varësi të kushteve të tregut dhe përcaktohet nga kërkesa dhe oferta e tregut. Yield është një formë vlerësimi dhe nuk lidhet aspak me normën e detyrueshme e cila është e përcaktuar në masën 7.625% në vit përgjatë gjithë periudhës së maturimit.
Për emetuesin e Eurobondi, në këtë rast Qeveria Shqiptare, është më mirë që interesi yield-i të jetë më i ulët, pasi kjo ul koston potenciale të rifinancimit në rast se emetuesi dëshiron të futen në treg për të riemetuar borxh. Konkretisht kjo pritet të ndodh në nëntor të 2015.
Duke analizuar grafikun e ecurisë së yield-it që prej nëntorit 2010, vihet re se yield-i është rritur në mënyrë të ndjeshme në periudhën shtator-dhjetor 2011, gjatë pikut të krizës qeveritare në Eurozonë dhe uljes së kërkesës për borxhin e qeverive më pak të sigurta dhe me renditje të ulët (si Shqipëria). Norma e interesit gjatë kësaj periudhe arriti maksimumin prej 11.975%. Në këtë moment nëse qeveria shqiptare do të dëshironte të rifinanconte borxh në Euro në tregjet ndërkombëtare, kuponi do ishte rreth 12%.
Qe nga ajo periudhe, yield-i ka rënë duke arritur normën më të ulët (2.11%) gjatë prillit të vitit 2015.
Burimi: Ministria e Financave, Bloomberg
Komentet dhe analiza: ODA
Ulja nuk ka ardhur për arsye të përmirësimit të kushteve të ekonomisë shqiptare, por për shkak të optimizmit të përgjithshëm në treg për borxhin qeveritar të periferisë së Eurozonës, pas ndërhyrjes së Bankës Qëndrore Europiane. Kjo ka përmirësuar performancën e Eurobondit shqiptar dhe aktualisht, qeveria shqiptare në një rifinancim të ardhshëm të borxhit do kishte një kosto më të ulët riemetimi, krahasuar me emetimin fillestar. Natyrisht edhe afrimi i datës së maturimit ul yield-in e obligacionit.
Bazuar në këto të dhëna, por edhe në normat e interesit të vendeve me cilësi të ngjashme krediti, rritet mundësia që qeveria shqiptare të zgjedhë të emetojë një obligacion 5-vjecar (me maturim të ngjashëm me Eurobondin fillestar) por me një shumë më të madhe, për të shfrytëzuar kushtet aktuale të tregut dhe sigurimin e një financimi shtesë që mund të shfrytëzohet për investime të ndryshme publike.
